ಎರಡು ಪದ, ಮೂರು ಪುಸ್ತಕ, ಒಂದಷ್ಟು ಲಿಂಕು, ಪುರಂದರದಾಸರ ಪುಣ್ಯದಿನಕ್ಕೆ…

ದಾಸರ ಪದಗಳ ಭಜನೆಗಳನ್ನ ಕೇಳುವದು ಮತ್ತು ಅವುಗಳಲ್ಲಿ ಭಾಗವಹಿಸುದು ನನಗೆ ಬಹಳ ಇಷ್ಟವಾಗುತ್ತದೆ. ಯಾವಾಗಿನಿಂದ ಇದು ಶುರುವಾಯಿತು ಅನ್ನುವದು ನೆನಪಿನಲ್ಲಿಲ್ಲ, ಆದರೆ ಈ ಅಭಿರುಚಿ ಬೆಳೆಯಲಿಕ್ಕೆ ಚಿಕ್ಕಂದಿನ ರಜಾ ದಿನಗಳಲ್ಲಿ ನಮ್ಮ ಅಮ್ಮನ ತವರೂರು ಕುಕನೂರಿಗೆ ಹೋದಾಗ ಅಲ್ಲಿ ಪ್ರತಿ ಗುರುವಾರ ಸಂಜೆ ನಡಯುತ್ತಿದ್ದ ಭಜನೆ ಬಹಳ ಮುಖ್ಯ ಪಾತ್ರವಹಿಸಿರಬೇಕು ಅನಿಸುತ್ತದೆ. ನಮ್ಮ ಅಜ್ಜಿ ತಾತರ ಮನೆಯಲ್ಲಿ ರಾಯರ (ರಾಘವೇಂದ್ರ ಸ್ವಾಮಿಗಳ) ಬೃಂದಾವನವಿದ್ದದ್ದರಿಂದ, ಪ್ರತಿ ಗುರುವಾರ ಬೆಳಗಿನ ಹೊತ್ತು ಗಂಡಸರೆಲ್ಲ ಸೇರಿ ರಾಯರ ಅಷ್ಟೋತ್ತರ ಪಾರಾಯಣ ಮಾಡಿದರೆ ಸಂಜೆಗೆ ಹೆಂಗಸರು ಭಜನೆ ಮಾಡುತ್ತಿದ್ದರು. ಇವೆರಡು ಚಿತ್ರಗಳು ಯಾವತ್ತೂ ಮರೆಯುವದಿಲ್ಲ.ಆ ದಿನಗಳಲ್ಲಿ ಭಜನೆಗಳಲ್ಲಿ ಕೇಳಿದ ‘ನಮಃ ಪಾರ್ವತಿ ಪತಿ ನುತ ಜನ ಪರ namO ವಿರೂಪಾಕ್ಷ’, ‘ಪವಮಾನ ಪವಮಾನ ಜಗದ ಪ್ರಾಣ’, ಮೊದಲಾದ ಹಾಡುಗಳು ಇವತ್ತೂ ಆ ನೆನಪುಗಳನ್ನು ತರುತ್ತವೆ.

ಭಜನೆಗಳಲ್ಲಿ  ಪಾಲ್ಗೊಳ್ಳಲು ಇಲ್ಲಿ ಅಮೆರಿಕದಲ್ಲೂ ಸಾಧ್ಯವಾದದ್ದು ‘ಶ್ರೀ ವ್ಯಾಸ ಭಜನಾ ಮಂಡಳಿ’ಯ ಸಂಪರ್ಕವಾದ ನಂತರ. ಪ್ರತೀ ಏಕಾದಶಿಗೊಮ್ಮೆ, ಹಬ್ಬ ಹರಿದಿನಗಳಂದು, ದಾಸರ ಪುಣ್ಯ ತಿಥಿಗಳಂದು, ಹೀಗೆ ಅವಕಾಶವಾದಗಲೆಲ್ಲ ನಡೆಯುವ ಭಜನೆಗಳಲ್ಲಿ ಪಾಲ್ಗೊಂಡು ಬಹಳ ಖುಷಿಪಟ್ಟಿದ್ದೇನೆ. ಪ್ರತೀ ಬಾರಿಯೂ ಭಾಗವಹಿಸಲು ಆಗದಿದ್ದರೂ, ಅವಕಾಶವಾದಾಗ ತಪ್ಪಿಸುವದಿಲ್ಲ. ಇವತ್ತು ಪುರಂದರ ದಾಸರ ಪುಣ್ಯ ದಿನದ ನಿಮಿತ್ತ ಇದ್ದ ಭಜನೆಯಲ್ಲಿ ಪಾಲ್ಗೊಳ್ಳಲು ಆಗಲಿಲ್ಲ. ಈಗ ಅದೇ ನೆಪದಲ್ಲಿ ಭಜನೆಯ ಬಗ್ಗೆ ನಾಲ್ಕು ಮಾತು ಬರೆಯುತ್ತಿರುವೆ. ಈ ಭಜನೆಗಳಲ್ಲಿ ಎಷ್ಟೋ ಹೊಸ ಹಾಡುಗಳನ್ನು ಕೇಳಿದ್ದೇನೆ. ಮೊದಲ ಬಾರಿಗೆ ಇಷ್ಟವಾದವು ಎಷ್ಟೋ ಹಾಡುಗಳು. ಎರಡು ವಾರಗಳ ಹಿಂದೆ ವೈಕುಂಠ ಏಕಾದಶಿ ನಿಮಿತ್ತದ ಭಜನೆಯಲ್ಲಿ ಪುರಂದರ ದಾಸರ ಒಂದು ಪದವನ್ನು ಕೇಳಿದೆ. ಅದು ಎಷ್ಟು ಇಷ್ಟವಾಯಿತೆಂದರೆ, ಹಾಡಿನ ಪುಸ್ತಕದಲ್ಲಿ ಆ ಪುಟದ ಚಿತ್ರವನ್ನು ಫೋನಿನ ಕ್ಯಾಮರಾದಲ್ಲಿ ಸೆರೆಹಿಡಿದು ತಂದೆ. ಆ ಹಾಡು ಇದು (ಫೋಟೋದಿಂದ ಟೈಪಿಸದೆ ಗೂಗಲಿಸಿದಾಗ ಇಲ್ಲಿ  ಸಿಕ್ಕಿದ್ದನ್ನು ಪೇಸ್ಟಿಸಿದೆ 🙂 ),

ಕನಸು ಕಂಡೇನ ಮನದಲಿ ಕಳವಳಗೊಂಡೇನ ||ಪ||
ಏನ ಹೇಳಲಿ ತಂಗಿ ತಿಮ್ಮಯ್ಯನ ಪಾದವನು ಕಂಡೆ ||ಅ.ಪ||
ಪೋನ್ನದ ಕಡಗನಿಟ್ಟು ತಿಮ್ಮಯ್ಯ  ತಾ | ಪೋಲ್ವನಾಮವನಿಟ್ಟು |
ಅಂದುಗೆ ಘಲುಕೆನ್ನುತಾ ಎನ್ನಮುಂದೆ | ಬಂದು ನಿಂತಿದ್ದನಲ್ಲೇ ||೧||
ಮಕರ ಕುಂಡಲನಿಟ್ಟು ತಿಮ್ಮಯ್ಯ  ತಾ | ಕಸ್ತೂರಿ ತಿಲಕನಿಟ್ಟು |
ಗೆಜ್ಜೆ ಘಲುಕೆನುತಾ ಸ್ವಾಮಿ ತಾ | ಬಂದು ನಿಂತಿದ್ದನಲ್ಲೇ ||೨||
ಮುತ್ತಿನ ಪಲ್ಲಕ್ಕಿ ಯತಿಗಳು | ಹೊತ್ತು  ನಿಂತಿದ್ದರಲ್ಲೇ |
ಛತ್ರಚಾಮರದಿಂದ ರಂಗಯ್ಯನ | ಉತ್ಸವ ಮೂರುತಿಯ ||೩||
ತಾವರೆ ಕಮಲದಲಿ  ಕೃಷ್ಣಯ್ಯ ತಾ | ಬಂದು ನಿಂತಿದ್ದನಲ್ಲೇ |
ವಾಯುಬೊಮ್ಮಾದಿಗಳು ರಂಗಯ್ಯನ | ಸೇವಯ ಮಾಡುವರೆ ||೪||

ನವರತ್ನ ಕೆತ್ತಿಸಿದ | ಸ್ವಾಮಿ ಎನ್ನ | ಹೃದಯಮಂಟಪದಲ್ಲಿ |
ಸರ್ವಾಭರಣದಿಂದ ಪುರಂದರ | ವಿಠಲನ ನೋಡಿದೆನೇ ||೫||

*************************
ಪುರಂದರದಾಸರ ಜೀವನ ಕತೆಯನ್ನು ಹೇಳುತ್ತಾ, ಅವರ ಅನುಗ್ರಹಕ್ಕಾಗಿ ಪ್ರಾರ್ಥನೆ ಮಾಡುವ ವಿಜಯದಾಸರ ಈ ಹಾಡು ಬಹಳ ಇಷ್ಟ.
ಗುರು ಪುರಂದರ ದಾಸರೇ ನಿಮ್ಮ ಚರಣ ಕಮಲವ ನಂಬಿದೆ ||ಪ||
ಗರುವ ರಹಿತನ ಮಾಡಿ ಎನ್ನನು ಪೊರೆವ ಭಾರವು ನಿಮ್ಮದೇ ||ಅ.ಪ||
ಒಂದು ಅರಿಯದ ಮಂದಮತಿ ನಾ | ನಿಮ್ಮದು ನಿಮ್ಮನು ನಂಬಿದೆ |
ಇಂದಿರೇಶನ ಪಾದ ತೋರಿಸೋ ತಂದೆ ಮಾಡೆಲೋ ಸತ್ಕ್ರುಪೆ ||೧||
ಮಾರಜನಕನ ಸನ್ನಿಧಾನದಿ | ಸಾರಗಾಯನ ಮಾಡುವ |
ನಾರದರೆ ಈ ರೂಪದಿಂದಲಿ ಕೋರೆ ದರುಶನ ತೋರಿದೆ ||೨||
ಪುರಂದರಾಲಯ ಘಟ್ಟದೊಳು ನೀ | ನಿರುತ ಧನವ ಗಳಿಸಲು |
ಪರಮ ಪುರುಷನು ವಿಪ್ರನಂದದಿ | ಕರವ ನೀಡಿ ಯಾಚಿಸೆ ||೩||
ಪರಮ ನಿರ್ಗುಣ ಮನವನರಿತು | ಸರುವ ಸೂರಿಯ ಗಯಿಸಿದ |
ಅರಿತು ಮನದಲಿ ಜರಿದು ಭವಗಳ | ತರುಣಿ ಸಹಿತ ಹೊರ ಹೊರಟನೆ ||೪||
ಅಜಭವಾದಿಗಳರಸನಾದ | ವಿಜಯವಿಠಲನ ಧ್ಯಾನಿಪ |
ನಿಜ ಸುಜ್ಞಾನವ ಕೊಡಿಸ ಬೇಕೆಂದು | ಭಜಿಪೆನೋ ಕೇಳ್ ಗುರುವರ ||೫||
ಹಂಸಾನಂದಿ ಅವರು ಪುರಂದರದಾಸರು ಪುರಂದರಗಡದವರು ಹೌದೆ ಅಲ್ಲವೇ ಎಂಬುದರ ಕುರಿತು ಚಿಕ್ಕ ಟಿಪ್ಪಣಿಯನ್ನೂ ಮತ್ತು ಅದರ ಜೊತೆಗೆ ಮೂಗುತಿ ಪ್ರಕರಣವನ್ನು  ತಮ್ಮ ಕಲ್ಪನೆಯಲ್ಲಿ ಒಳ್ಳೆಯ ಕತೆಯಾಗಿ ಹೆಣೆದದ್ದನ್ನೂ ಹಾಕಿದ್ದನ್ನು ನೋಡಿದೆ. ಸೊಗಸಾಗಿದೆ ಮಾಹಿತಿ ಮತ್ತು ಕತೆ. ಅದನ್ನ ಇಲ್ಲಿ ((ತಂಬೂರಿ ಮೀಟಿದವ.. ಭವಾಬ್ದಿ ದಾಟಿದವ ….) ಓದಬಹುದು.
*******************************
ಹರಿದಾಸರ ಬಗ್ಗೆ ಆಸಕ್ತಿ ಮೂಡಿಸಿದ ಮೊದಲ ಪುಸ್ತಕ ಬೇಲೂರು ಕೇಶವ ದಾಸರ ‘ಕರ್ನಾಟಕ ಭಕ್ತ ವಿಜಯ’. ಅದರಲ್ಲಿ ಹರಿದಾಸ ಪರಂಪರೆಗೆ ಪೋಷಕರಾದ ಯತಿಗಳ ಮತ್ತು ಹರಿದಾಸರುಗಳ ಜೀವನ ಕಥನವನ್ನು ಬಹಳಷ್ಟು ಬಾರಿ ಓದಿದ್ದೇನೆ. ಇವತ್ತಿಗೂ ಮನಸ್ಸು ವ್ಯಗ್ರವಾದಾಗ ಅದನ್ನು ಹಿಡಿದು ಅದರಲ್ಲಿ ಯಾವುದೇ ದಾಸರ, ಯತಿಗಳ ಕತೆ ಓದಿದರೂ ಮತ್ತೆ ಮನಸ್ಸಿಗೆ ಹಿತವಾಗುತ್ತದೆ.
ಅದಾದ ಮೇಲೆ ಬಹಳಷ್ಟು ಹಿಡಿಸಿದ್ದು ಬನ್ನಂಜೆ ಗೋವಿಂದಾಚಾರ್ಯರ ಪ್ರವಚನವೊಂದರ ಪುಸ್ತಕ ರೂಪ ‘ಪುರಂದರೋಪನಿಷತ್’. ಪುರಂದರ ದಾಸರ ಒಂದು ಪದ ‘ಏಳು ನಾರಾಯಣ‘ವನ್ನು ಎಳೆ ಎಳೆಯಾಗಿ ಬಿಡಿಸಿ, ಅದರ ಆಧ್ಯಾತ್ಮಿಕ ಅರ್ಥದ ಹೊಳಹನ್ನು ತೋರಿಸಿ, ಪುರಂದರ ದಾಸರ ಸಾಹಿತ್ಯವನ್ನು ವ್ಯಾಸತೀರ್ಥರು ಪುರಂದರೋಪನಿಷತ್ ಎಂದು ಯಾಕೆ ಕರೆದಿದ್ದರು ಎಂಬುದನ್ನು ಬಹಳ ಚನ್ನಾಗಿ ತಿಳಿಸಿದ ಪುಸ್ತಕವದು. ಮತ್ತೆ ಮತ್ತೆ ಓದಬೇಕು ಅನಿಸುವ ಪುಸ್ತಕ.
*******************************
ಪುರಂದರ ದಾಸರ ಪದಗಳ ಬಗ್ಗೆ ಓದಿದ ವಿಶಿಷ್ಟ ಪುಸ್ತಕ ಡಾ| ಎಚ್ ಎನ್ ಮುರಳೀಧರ ಅವರ ‘ತಂಬೂರಿ ಮೀಟಿದವ’. ಪುರಂದರದಾಸರ ಪದಗಳನ್ನು ಈ ನೋಟದಲ್ಲಿ ನೋಡುವ ಪ್ರಯತ್ನವೊಂದು ಖಂಡಿತವಾಗಿಯೂ ಬೇಕಿತ್ತು. ಪದಗಳಲ್ಲಿ ಬರುವ ಹಲವು ವಿಧವಾದ ಪಲ್ಲವಿಗಳನ್ನು ಇವರು ವಿಂಗಡಿಸಿದ ರೀತಿ, ಪದಗಳ ಛಂದಸ್ಸು, ಶೈಲಿಗಳ ಚಿಂತನೆ, ಪದಗಳಲ್ಲಿ ಬಳಕೆಯಾದ ಅಡು ಮಾತು, ಹೀಗೆ ಹಲವು ಬಗೆಯಲ್ಲಿ ತಮ್ಮ ವಿಚಾರಗಳನ್ನು ಮಂಡಿಸಿದ ರೀತಿ ಬಹಳ ಹಿಡಿಸಿತು. ದಾಸರ ಪದಗಳನ್ನು ಇವರು ದೇಸೀ ಅಭಿವ್ಯಕ್ತಿ ಸ್ವರೂಪದ ಹಿನ್ನೆಲೆಯಲ್ಲಿ ನೋಡುವ ನೋಟ ಬಹು ವಿಶಿಷ್ಟವಾಗಿದೆ. ಈ ಪುಸ್ತಕದ ಪರಿವಿಡಿ ನೋಡಿ ಪುಸ್ತಕವನ್ನು ಕೊಂಡಿದ್ದೆ. ಇದನ್ನ ಒಂದು ಬಾರಿ ಓದಿ ಮುಗಿಸುವದು ನನಗಾಗುವದಿಲ್ಲ. ನಿಧಾನವಾಗಿ ಅವಕಾಶವಾದಂತೆ ಒಂದೊಂದೇ ಅಧ್ಯಾಯಗಳನ್ನು ಓದುತ್ತಿರುವೆ.
Advertisements

ಹಳೇ ಪುಸ್ತಕಗಳು…

ಇವತ್ತು ಸಾಂಟಾಕ್ಲಾರಾ ಲೈಬ್ರರಿಯಲ್ಲಿ ಹಳೇ ಪುಸ್ತಕಗಳ ಮಾರಾಟವಿತ್ತು. ದೊಡ್ಡ ಬ್ಯಾಗ್ ಒಂದರಲ್ಲಿ ಹಿಡಿಸಿದಷ್ಟು ಪುಸ್ತಕ ತುಂಬಿಕೊಳ್ಳಬಹುದು. ಬೆಲೆ ೫ ಡಾಲರ್ ಮಾತ್ರ. ಆಗಾಗ ನಡೆಯುತ್ತಿರುತ್ತದೆ ಇಂತಹ ಮಾರಾಟ.  ಒಂದಷ್ಟು ಅದೃಷ್ಟವಿದ್ದರೆ ಒಳ್ಳೊಳ್ಳೆ ಪುಸ್ತಕಗಳೇ ಸಿಗಬಹುದು.  ಹೋಗಿ ಒಂದು ಅರ್ಧ ಬ್ಯಾಗ್ ಭರ್ತಿ ಪುಸ್ತಕಳನ್ನು ಹೊತ್ತು ಕೊಂಡು ಬಂದೆ.  ಸುಲಭದಲ್ಲಿ ಹರಿಯಲಾಗದ ದಪ್ಪ ರಟ್ಟಿನ ಒಂದಷ್ಟು ಪುಸ್ತಕಗಳನ್ನ ನನ್ನ ಮಗನಿಗಾಗಿ ತಂದರೆ ನನ್ನ ಓದಿಗೆ ತಂದದ್ದು ಅರ್ನೆಸ್ಟ್ ಹೆಮಿಂಗ್ವೇಯ ಸಣ್ಣ ಕತೆಗಳ ಸಂಗ್ರಹ, ಬಹಳ ದಿನಗಳಿಂದ ಓದಬೇಕು ಎಂದುಕೊಂಡಿದ್ದ ‘ಓ ಜೇರುಸಲೇಮ್’ ಹಾಗೂ ಈ ಹಿಂದೆ ಎರಡು ಬಾರಿ ಕೊಂಡು ಬೇರೆಯವರಿಗೆ ಕೊಟ್ಟಿದ್ದ  ‘ಮ್ಯಾನ್ಸ್ ಸರ್ಚ್ ಫಾರ್ ಮೀನಿಂಗ್’.  ವಿಕ್ಟರ್ ಫ್ರಾಂಕೆಲ್ಲನ ಪುಸ್ತಕವನ್ನು ಓದಿದ್ದೇನೆ ಈ ಮೊದಲು. ಆದರೂ ಮ್ಯಾನ್ಸ್ ಸರ್ಚ್ ಫಾರ್ ಮೀನಿಂಗ್ ಪುಸ್ತಕ ನನ್ನ ಸಂಗ್ರಹದಲ್ಲಿ ಇರಬೇಕು ಅನಿಸಿದ್ದರಿಂದ ಮತ್ತೆ ಕೊಂಡುಕೊಂಡೆ. ಒಂದು ಗಂಟೆಗೂ ಹೆಚ್ಚು ಕಾಲ ಆ ಹಳೆ ಪುಸ್ತಕಗಳ ಮಧ್ಯೆ ಅಡ್ಡಡಿದರೂ ಒಂದು ಬ್ಯಾಗ್ ಭರ್ತಿ ಮಾಡಿಕೊಳ್ಳುವಷ್ಟು ಪುಸ್ತಕ ಸಿಗಲಿಲ್ಲವಲ್ಲ ಅನಿಸಿತು ಆದರೆ.

೩-೪ ತಿಂಗಳ ಹಿಂದೆ ಬೆಂಗಳೂರಿನಲ್ಲಿ ತಿರುಗಾಡುತ್ತಿದ್ದಾಗ ನೋಡಿದ ಹಳೇ ಪುಸ್ತಕಗಳ ಮಾರಾಟಗಾರರು ನೆನಪಾದರು. ಅವತ್ತೊಂದು ದಿವಸ ಹಳೇ ಪುಸ್ತಕವೊಂದನ್ನು ಕೊಂಡು ಹಾಗೇ ಹೊಸ ಪುಸ್ತಕಗಳನ್ನೂ ಹುಡುಕಿಕೊಂಡು ಹೋದಾಗಿನ ಅನುಭುವವನ್ನು ಬರೆದಿಟ್ಟುಕೊಂಡಿದ್ದೆ, ಈಗ ಹಾಕುತ್ತಿದ್ದೇನೆ ಇಲ್ಲಿ ಕೆಳಗೆ.

ವರ್ಷಗಳಾಗಿತ್ತು ಬೆಂಗಳೂರಿನ ಬೀದಿಗಳಲ್ಲಿ, ರಸ್ತೆ ಬದಿಯಲ್ಲಿ ಒಟ್ಟಿರುವ ಪುಸ್ತಕಗಳ ಸಾಲುಗಳಲ್ಲಿ ಕಣ್ಣು ಹಾಯಿಸುತ್ತ ಅಡ್ಡಾಡಿ. ಇವತ್ತು ಅಂತಹದೊಂದು ‘ಅಂಗಡಿ’ಯಿಂದ ಡಿ.ಆರ್.ನಾಗರಾಜರ ‘ಸಾಹಿತ್ಯ ಕಥನ’ ಪುಸ್ತಕವನ್ನು ಕೊಂಡುಕೊಂಡೆ (ಒಂದಷ್ಟು ಚೌಕಾಶಿಯೂ ಮಾಡಿದೆ ಅನ್ನಿ 😉 ). ಆಸಕ್ತಿ ಹುಟ್ಟಿಸುವ ಪ್ರಬಂಧಗಳಿವೆ ಅನಿಸುತ್ತದೆ. ಓದಬೇಕು ನಿಧಾನವಾಗಿ.

ಹಾಗೇ ಮುಂದುವರೆದು ನಾನು ಕೇಳಿದಂತೆ ಬಹಳ ಒಳ್ಳೇ ಹೆಸರುಳ್ಳ ಪುಸ್ತಕದಂಗಡಿಯನ್ನು ಹೊಕ್ಕೆ. ಅಲ್ಲಿ ಹೆಕ್ಕಿಕೊಂಡ ಪುಸ್ತಕಗಳು, ನೇಮಿಚಂದ್ರರ ಇಲ್ಲಿಯವರೆಗಿನ ಕಥೆಗಳು, ಜೋಗಿ ಬರೆದ ಕಥೆಗಳು ಹಾಗೂ ವಸುಧೇಂದ್ರರ ನಮ್ಮಮ್ಮ ಅಂದ್ರೆ ನನಗಿಷ್ಟ. ನೇಮಿಚಂದ್ರರ ಯಾದ್ ವಶೇಮ್ ಮತ್ತು ಪಾವೆಂ ಅವರ ಪದಾರ್ಥ ಚಿಂತಾಮಣಿ ಹುಡುಕಿದೆ, ಇರಲಿಲ್ಲ. ಯಾದ್ ವಶೇಮ್ ತರಿಸಿ ಕೊಡುತ್ತಾರಂತೆ ಹಾಗೂ ಪದಾರ್ಥ ಚಿಂತಾಮಣಿ ಬಗ್ಗೆ ವಿಚಾರಿಸುತ್ತಾರಂತೆ. ಮತ್ತೆ ಫೋನ್ ಮಾಡಬೇಕು.

ಅಂಗಡಿ ಮಾಲೀಕರು ಬಿಲ್ ಬರೆಯುತ್ತಿದ್ದಾಗ ಅವರನ್ನು ಕೇಳಿದೆ, ‘ಕನ್ನಡದಲ್ಲಿ ಹೊಸತಾಗಿ ಬರುತ್ತಿರುವ ಲೇಖಕರ ಪುಸ್ತಕಗಳು ಹೇಗೆ ಮಾರಾಟ ಆಗುತ್ತಿವೆ ? ಯಾರು ಹೊಸಬರಲ್ಲಿ ಪ್ರಮುಖರು?”

ಆದಕ್ಕೆ ಅವರು ಹೇಳಿದ್ದು ಜೋಗಿ ಕಥೆ ಚನ್ನಾಗಿದೆ, ಚೇತನ ತೀರ್ಥಹಳ್ಳಿ ಅವರ ಭಾಮಿನಿ ಷಟ್ಪದಿ ಹೀಗೆ ಕೆಲವೊಂದು ಬರ್ತಿದೆ. ಆದರೆ ಬಹಳ ಸತ್ವಶಾಲಿ ಅನಿಸುವಂತಹದ್ದು ಬರುವದು ನಿಂತು ಬಹಳ ಕಾಲವಾಗಿದೆ.  ಭೈರಪ್ಪನವರೊಬ್ಬರು ಅಂತಹದನ್ನ ಈಗಲೂ ಬರೀತಾರೆ ಆದರೆ ಅವರ ಕಾದಂಬರಿಗಳು ೩-೪ ವರ್ಷಕ್ಕೆ ಒಂದರಂತೆ ಬರುತ್ತೆ. ಅದು ಬಿಟ್ಟರೆ ಉಳಿದದ್ದೆಲ್ಲ ಹೀಗೆ. ಕನ್ನಡ ಪುಸ್ತಕಗಳು ಈಗ ಹೆಚ್ಚು ಕಡಿಮೆ ಲೈಬ್ರರಿಗಳಿಗಾಗಿ ಮಾತ್ರ ಪ್ರಿಂಟ್ ಆಗುವಂತೆ ಆಗಿವೆ.  ನೇರವಾಗಿ ಸಾಹಿತಿಗಳಿಗೆ ಇದನ್ನು ಹೇಳಿದರೆ ನಿಮ್ಮ ಅಂಗಡಿಯಲ್ಲಿ ಮಾರಾಟ ಆಗಲಿಲ್ಲ ಅಂದರೆ ಪುಸ್ತಕ ಎಲ್ಲೂ ಮಾರಾಟವೇ ಆಗಲಿಲ್ಲ ಅಂತ ಅರ್ಥವೇ ಅಂತೆಲ್ಲ ಹೇಳುತ್ತಾರೆ, ಅವರಿಗೆ ಸಿಟ್ಟೂ ಬರಬಹುದು!

ಕನ್ನಡ ಪುಸ್ತಕಗಳ ಸ್ಥಿತಿ ನಿಜಕ್ಕೂ ಅಷ್ಟು ಕೆಳಗಿಳಿದಿದೆಯೆ ಎಂದು ಯೋಚಿಸುತ್ತ, ಕೊಡಬೇಕಾದ ೨೫೦ ರೂ ಕೊಟ್ಟು ಹೊರ ಬಂದೆ.

ಅಲ್ಲಿಂದ ಬಂದಮೇಲೆ ನಾನು ಕೊಂಡ ಪುಸ್ತಕಗಳನ್ನು ಓದಿದ ಮೇಲೆ, ಓದಬೇಕು ಅನಿಸಿದ ಇನ್ನಷ್ಟು ಪುಸ್ತಕಗಳ ಬಗ್ಗೆ ವಿಚಾರಿಸಿದ ಮೇಲೆ ನನಗೇನೂ ಹಾಗನ್ನಿಸಲಿಲ್ಲ . ಹಾಗೆ ನೋಡಿದರೆ ಭೈರಪ್ಪನವರ ಆವರಣವೇ ಅಷ್ಟು ತೃಪ್ತಿ ಕೊಡಲಿಲ್ಲ. ಓದಿದ ಮೇಲೆ ಏನೋ missing ಅನಿಸಿದೆ. ನೇಮಿಚಂದ್ರರ ಒಂದು ಕತೆ ‘ಬದುಕು ಕಾಯುವದಿಲ್ಲ’ ಬಗ್ಗೆ ಇಲ್ಲಿ ಬರೆದುಕೊಂಡಿದ್ದೆ. ಅವರ ಯಾದ್ ವಶೇಮ್  ಶುರುವಾತಿನಲ್ಲಿ ಒಂದಿಷ್ಟು ಓದಿಸಿಕೊಳ್ಳಲಿಲ್ಲ ಅನಿಸಿದರೂ ಮುಗಿಸುವಾಗ ಇಷ್ಟ ಆಯಿತು. ವಸುಧೇಂದ್ರರ ನಮ್ಮಮ್ಮ ಅಂದ್ರೆ ನನಗಿಷ್ಟ ತುಂಬಾನೇ ಇಷ್ಟ ಆಯಿತು. ಅದರ ಬಗ್ಗೆ ಇನ್ನೊಮ್ಮೆ ಬರೆಯಬೇಕು. ಜೋಗಿ ಕತೆಗಳು ಗಾತ್ರದಲ್ಲಿ ಚಿಕ್ಕವಾದರೂ ದೊಡ್ಡ ಪಂಚ್ ತುಂಬಿರುತ್ತವೆ. ನಾನು ಇತ್ತೀಚೆಗೆ ಓದಿದ, ಕೇಳಿದ ಕೆಲವೇ ಪುಸ್ತಕಗಳಿಂದ ಕನ್ನಡದ ಪುಸ್ತಕ ಲೋಕವನ್ನು ಅಳೆಯಲಾಗದು. ಆದರೂ ಇಂಟರ್ನೆಟ್ಟಿನಲ್ಲಿ ಕನ್ನಡದ ಸಾರಸ್ವತ ಲೋಕ  ಅನಾವರಣಗೊಳ್ಳುತ್ತಿರುವದನ್ನು ನೋಡಿದರೆ ಕನ್ನಡದಲ್ಲಿ ಪುಸ್ತಕಗಳ, ಲೇಖಕರ ಕೊರತೆಯಾಗಬಹುದು ಎಂದೇನೂ ಅನಿಸಿಲ್ಲ.   ಬಹಳ simplified observation ಆಯ್ತೇ ಏನೋ ಗೊತ್ತಿಲ್ಲ 🙂